Եվ եղար դու

Դու, որ իմ ներսում ես հիմա

և մաքրամաքուր ես այնպես, ինչպես

երբեք չես լինելու,

քեզ կրելուց հետո է

որ այս աշխարհից սիրտս խաառնում է

բալիկս, կներես, որ քեզ բերելու եմ

ու այս բորենիների աշխարհին մատուցեմ;

Բայց այստեղ լավ բաներ լինում են

թեկուզ հազվադեպ.

օրինակ քեզ նման հրաշքը

խմորվել է մեր աշխարհում

ու տաք հացի նման

ցորենի նման իմ արդար զավակ:

Ճամփա ես ընկել ու լուր ես բերում  Աստծուց,

որ իմ ու հորդ մեղքերին Նա թողություն է տվել:

 

***

Պարզ

Շատ պարզ եղավ

Արարումը քո.

Եղիցի լույս

Շշնջաց Նա

Եվ եղար դու

Լույս իմ:

 

***

Այս ձյունը, դստրիկս

մաքրում է օդը

ու փոշին է մաքրում

ճանապարհների

որոնցով գալու ես դու:

Մինչ կհասնես

աշխարհը ճերմակ- ճերմակ կլինի,

քեզ նման մաքուր ու

ամանորի կախարդանքի պես հրաշալի։

Կգաս ու

գուցե հետո ինքդ գլխի կընկնես

որ այստեղ ամեն բան խաբուսիկ է

ձյան մաքրության նման

ու ամանորի կախարդանքի պես:

 

***

Հիմա գիշեր է,

և  ես տիեզերքն եմ

ոչ ավել ու ոչ պակաս.

դու մայր ես մտել գրկումս,

Արև իմ։

Կմեծանաս դու,

փոքրիկս,

և կմտածես

ճիշտ ու ճիշտ ինձ նման,

որ չկա առավել գեղեցիկ բան

քան անձրեւից լվացված բալը ճյուղին`

կաթիլը պլպլան երեսին պահած։

Ճիշտ ես։

Բայց դու, բալիկս,

հիշիր

որ մայրիկը քեզ ասել է`

դու ավելին ես քան

անձրեւից լվացված բալը`

կաթիլը պլպլան երեսին առած։

Կա գեղեցիկից անդին եւ դա

Մենք ենք`

դու գրկում իմ։

Մայրիկը աղքատ աղքատ է

քո մասին ինչ-որ բան գրելիս,

ներիր նրան ու հիշիր

դու իմ տոնն ես։

 

***

Դու չես հավատում որ ես հանճար եմ,

որովհետեւ չես տեսել թե

որքան խաղաղ է քնած կրծքիս

իմ ամենակատարյալ

բանաստեղծությունը:

 

 

Կարծիքներ

կարծիք